ویکیپیدیای کوردی ئاماژەیە بە دوو ئێدیشن و بەشی ویکیپیدیا کە بریتین لە ویکیپیدیای کوردیی باکووری (کورمانجی) و ویکیپیدیای کوردیی ناوەندی (سۆرانی). ئەڵبەت ویکیپیدیای زازاکیش ھەیە، کە ئەویش دەبێت ھەر وەکوو بەشێک لە ویکیپیدیای کوردی بێتە ئەژمار.
ویکیپیدیای کوردی لە 7ی 1ی 2004دا دامەزرا. سەرەتا وا داڕێژرابوو کە ھاوکات وتارەکانی کورمانجی و سۆرانی لەخۆ بگرێت. لە 12ی 8ی 2009دا، ویکیپیدیای کوردی لەبەر ھەندێک بابەتی تەکنیکی و زمانی دابەش کرا بەسەر دوو بەشی کورمانجی و سۆرانی‌دا. ویکیپیدیا کۆنەکە (ku) وەکوو ویکیپیدیای کورمانجی مایەوە و یەکێکی نوێ (ckb) دروست کرا بۆ کوردیی سۆرانی.
بۆ زانیاریتان لە 16ی 4ی 1398دا ویکیپیدیای کوردیی ناوەندی 23،962 وتاری تێدا بوو. ئەمڕۆ کە 16ی 4ی 1399یە ژمارەی وتارەکان گەیشتووە بە 26،376 وتار. واتە لە ماوەی ئەم یەک ساڵەدا 2،450 وتاری نوێ نووسراوە. بەم ئامارانەدا بۆمان دەردەکەوێت کە دەبێت 73،624 وتاری تر بنووسرێت تا ژمارەی وتارەکان بگات بە سەد ھەزار وتار. ئەگەر ھەر بەم شێوە بچێتە پێشەوە، نزیکەی 30 ساڵی تر (کە دەکات بە ساڵی 2050ی زایینی) دەبات تا ژمارەی وتارەکانی ویکیپیدیای کوردیی ناوەندی بگات بە سەد ھەزار وتار.
ئەمە لە کاتێکدایە کە ھەر ئێستا ویکیپیدیای ئینگلیزی (6،114،503)، فارسی (735،423)، عەرەبی (1،050،730) و تورکی (358،043) وتاریان تێدایە. ئەڵبەت بەراوردکردنی کوردی لەگەڵ زمانانی تردا کارێکی زۆر بەجێ نییە، لەبەر ئەوەی کە ئێستاش زمانی کوردی لە دۆخێکی ئاوارتە و تایبەتدایە. بۆ نموونە ھێشتا کوردانی تورکیا و ئێران بە زمانی تورکی و فارسی لە خوێندنگەکان و زانکۆکاندا دەخوێنن، و تا ئێستا زمانی کوردی لەم دوو وڵاتەدا نەبووە بە زمانێکی فەرمی.
ڕێککەوتی بڵاوکردنەوە: 6ی 7ی 2020.
ویکیپیدیای ,لە ,کە ,کوردی ,بە ,کوردیی ,ویکیپیدیای کوردی ,ویکیپیدیای کوردیی ,کورمانجی و ,کوردیی ناوەندی ,کوردی لە ,ویکیپیدیای کوردیی ناوەندی
درباره این سایت